പഥികന്റെ കാൽപാട്



Showing posts with label നേപിൾസ്. Show all posts
Showing posts with label നേപിൾസ്. Show all posts

Wednesday, April 25, 2012

അഗ്നിപർവ്വതത്തിനു മുകളിൽ (വെസൂവിയസ്, പോം‌പൈ - ഇറ്റലി)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ഇറ്റലിയിലേക്ക് ഒന്നാം ഭാഗം ഇവിടെ....
അങ്ങനെ ചുവന്ന അമ്പിലേറി നേപിൾസിലേക്ക്....സർക്കാരിനെ നിയന്ത്രിക്കുന്ന മാഫിയാ സംഘങ്ങൾക്കും മയക്കുമരുന്ന് രാജാക്കന്മാർക്കും ഗ്യാങ്ങ് വാറുകൾക്കും കുപ്രസിദ്ധമായ നഗരം. ‘Godfather’ സിനിമയിലൂടെ ലോകമെങ്ങും അറിയപ്പെട്ട അധോലോകപട്ടണം സിസിലിയെക്കാൾ ഇറ്റാലിയൻ ഗവണ്മെന്റിന്‌ തലവേദന ഉണ്ടാക്കുന്ന,  പീറ്റ്സയുടെയും (Pizza) മാഫിയയുടെയും ജന്മഗൃഹം - ജർമ്മനിലും ഇറ്റാലിയനിലും നാപോളി എന്നറിയപ്പെടുന്ന നേപിൾസ്.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~



ഫ്രെച്ചാറോസ്സാ നേപിൾസ് റെയിൽ‌വേ സ്റ്റേഷനിൽ (Napoli Garibaldi) എത്തിയപ്പോൾ സമയം 9 മണി കഴിഞ്ഞു..ജൂൺ മാസത്തിൽ ജർമ്മനിയിലെ പോലെ രാത്രി 9.30 വരെ സൂര്യപ്രകാശമുണ്ടാവുമെന്ന പ്രതീക്ഷയിലാണ്  അവിടെ എത്തിയത്. നേപിൾസ് അത്ര സുരക്ഷിതമല്ലാത്തതു കൊണ്ട് ഇരുട്ട് പരക്കുന്നതിനു മുന്നെ ഹോട്ടലിലെത്തെണമെന്നും കരുതിയിരുന്നു. എന്നാൽ കുറച്ചു കൂടി ദക്ഷിണപ്രദേശമായതിനാൽ സമയം നേരത്തെ ഇരുട്ടിയിരിക്കുന്നു. റെയിൽ‌വേ സ്റ്റേഷൻ വൃത്തിയുള്ളതാണെങ്കിലും പുറത്തിറങ്ങിയാൽ നേപ്പിൾസിന്റെ യഥാർത്ഥമുഖം കാണാം.
നാപ്പോളി ഗരിബാൾഡി


മാലിന്യസംസ്കരണം മുതൽ കുടിവെള്ളം വരെ നേപ്പിൾസിൽ എല്ലാം നിയന്ത്രിക്കുന്നത് ഇറ്റാലിയൻ മാഫിയയാണത്രേ. പല മാഫിയാ സംഘങ്ങൾ തമ്മിലുള്ള ചേരിപ്പോരു മൂലം എല്ലാം താറുമാറായി കിടക്കുകയാണ്. റോഡിനിരുവശവും മാലിന്യം കൂമ്പാരം കൂട്ടി വച്ചിരിക്കുന്നതു കാണാം.വഴിയിൽ കിടന്നുറങ്ങുന്നവരും ഇരുട്ടിൽ പലതരം വ്യാപാരങ്ങൾ നടത്തുന്നവരും എവിടെയുമുണ്ട്.ഇന്ത്യയിലെ നഗരങ്ങളെ വെല്ലുന്ന രീതിയിലാണ് ട്രാഫിക് മര്യാദകൾ. സിഗ്നലിൽ നിർത്തനോ റോഡ് മുറിച്ചുകടക്കുന്ന വഴിയാത്രക്കാരെ കടത്തിവിടാനോ ഉള്ള ഭാവം വാഹനമോടിക്കുന്നവരാരും കാണിക്കുന്നില്ല.ഒരിടത്തും സൈൻ ബോർഡോ നിർദ്ദേശങ്ങളോ ഒന്നുമില്ല.ഇതൊക്കെ നേരത്തേ വായിച്ചറിഞ്ഞിരുന്നതു കൊണ്ട് സ്റ്റേഷനു തൊട്ടടുത്തുള്ള ഒരു നല്ല ഹോട്ടലിൽ തന്നെയാണ് താമസം ശരിയാക്കിയിരുന്നത്.എന്നിട്ടും സ്റ്റേഷന്റെ തെറ്റായ എക്സിറ്റിലൂടെ ഇറങ്ങിയിട്ടായിരിക്കണം ഹോട്ടലിലേക്കുള്ള വഴി കണ്ടു പിടിക്കാൻ സാധിച്ചില്ല.

ഒന്നു രണ്ടുപേരോട് വഴി ചോദിക്കാൻ നോക്കിയെങ്കിലും ആരും അത്ര സൌഹൃദമനസ്കാരായി തോന്നിയില്ല.അവസാനം ഒറ്റനോട്ടത്തിൽ തന്നെ ഇറ്റലിക്കാരല്ല എന്ന് തോന്നിച്ച വൃദ്ധദമ്പതികളോട് വഴി ചോദിച്ചു.അവർ കൃത്യമായി ഹോട്ടൽ കാണിച്ചു തന്നു. കൂടാതെ ‘Be Careful’ എന്ന് ഒരുപദേശവും തന്നു.

ഹോട്ടലിലെത്തിയപ്പോൾ ശ്വാസം നേരേ വീണു. നല്ല സൗകര്യമുള്ള ഒരു സ്റ്റാർ ഹോട്ടൽ. രാത്രി എന്താണ്‌ കഴിക്കേണ്ടതെന്ന കാര്യത്തിൽ മാത്രം ഏതായാലും കൺഫ്യൂഷൻ ഉണ്ടായില്ല. പീറ്റ്സയുടെ ജന്മനാടായ നേപ്പിൾസിൽ വന്നിട്ട് വേറെ എന്ത് ട്രൈ ചെയ്യാൻ ?


പീറ്റ്സയുടെ നാട് - നേപ്പിൾസ്

കുളിയും തേവാരവും കഴിഞ്ഞ് അടുത്തദിവസം രാവിലെ പോംപെയിലേക്ക് തിരിച്ചു. നേപിൾസിൽ നിന്ന് സർകം വെസൂവിയാന എന്നു പേരുള്ള ലോക്കൽ മെട്രോ ട്രെയിനിലാണ്‌ പോംപൈക്കു പോകേണ്ടത്. (നേപിൾസിനടുത്തുള്ള ആധുനികനഗരം പോംപി എന്നും മണ്മറഞ്ഞ പുരാതന നഗരം പോം‌പൈ എന്നുമാണ് അറിയപ്പെടുന്നത്)
സർക്കം വെസൂവിയാന

നേപ്പിൾസിനു 20 കിമി വടക്കായി വെസൂവിയസ് അഗ്നിപർവ്വതത്തിന്റെ താഴ്വരയിൽ ഉണ്ടായിരുന്ന ഒരു കുഞ്ഞുഗ്രാമമായിരുന്നത്രേ പോംപൈ. സ്വന്തമായി കോട്ടമതിലും പടയാളികളും വ്യവസ്ഥിതിയും നിയമങ്ങളുമൊക്കെയുണ്ടായിരുന്ന ഒരു സ്വയംപര്യാപ്തഗ്രാമം. റോമാസാമ്രാജ്യം ശക്തിപ്രാപിച്ചപ്പോൾ പോം‌പൈ റോമിനു  കീഴിലായി. കലയിലും സാംസ്കാരത്തിലും നാഗരികതയിലും കാലത്തിനു മുൻപേ നടന്നു പോം‌പൈ.അങ്ങനെയിരിക്കെയാണ് നീണ്ട 800 വർഷത്തിനു ശേഷം എ.ഡി 79ൽ വെസൂവിയസ്  പൊട്ടിത്തെറിക്കുന്നത്. നിർത്താതെ രണ്ടു ദിവസം വെസൂവിയസ് തീതുപ്പി. പോം‌പൈയും സഹോദരനഗരമായ ഹെർകൂലിയവും അഗ്നിപർവ്വതത്തിൽ നിന്നുള്ള ചാരവും ലാവയും കൊണ്ടുമൂടി. 20 മീറ്റരോളം ആഴത്തിലുള്ള സ്ഫോടനാവശിഷ്ടങ്ങളിൽ ഇരു നഗരങ്ങളും കുഴിച്ചു മൂടപ്പെട്ടു. ഈ അപകടത്തിൽ എത്ര ജീവൻ പൊലിഞ്ഞു എന്നതിനു കൃത്യമായ കണക്കുകളൊന്നും നിലവിലില്ല.
പോം‌പൈക്കു മുകളിൽ തീ തുപ്പുന്ന വെസൂവിയസ് - ചിത്രകാരന്റെ ഭാവനയിൽ

അങ്ങനെ പോം‌പൈയെയും ഹെർകൂലിയവും കാലത്തിന്റെ വിസ്മൃതിയിൽ മറഞ്ഞു...അവിടെ ഒരു നാഗരികത ഉണ്ടായിരുന്നു എന്ന ഓർമ്മപോലും അവശേഷിപ്പിക്കാതെ...16ആം നൂറ്റാണ്ടിൽ  സർനോ നദിയെ വഴിതിരിച്ചു വിടാനായി ഒരു ടണൽ കുഴിക്കുന്നതിനിടയിലാണ് ചുവരെഴുത്തുകളും ചിത്രപ്പണികളും നിറഞ്ഞ പൊം‌പൈയിലെ ഒരു ചുവർ കണ്ണിൽ‌പെടുന്നത്..തുടന്നു നടന്ന ഖനനത്തിൽ ആയിരക്കണക്കിന് ഏക്കർ വിസ്തൃതിയിൽ, മണ്മറഞ്ഞു കിടന്ന വിസ്മയ ലോകം അന്വേഷകർ പുറത്തെടുത്തു. ചിതറിത്തെറിച്ച അവശിഷ്ടങ്ങൾ പെറുക്കിയെടുത്ത് കുന്നുകൂട്ടി, പോം‌പൈ എന്ന പൌരാണികനഗരത്തെ ഇന്നത്തെ തലമുറക്കു കണ്ടുമനസ്സിലാക്കാനായി പുനഃസൃഷ്ടിച്ചു. ഇന്ന് പോം‌പൈ, കഴിഞ്ഞകാലത്തിന്റെ തിരുശ്ശേഷിപ്പായി, നൂറ്റാണ്ടുകൾക്കു മുൻപ് നിന്നുപോയ ഒരു നിമിഷത്തിന്റെ ഫ്രീസ് ഫ്രെയിമായി ഇന്നലെയെ നോക്കിക്കാണാനെത്തുന്ന ദശലക്ഷക്കണക്കിനു യാത്രികരെ ആകർഷിക്കുന്നു
പോം‌പൈ സ്കാവി - റെയിൽ‌വേ സ്റ്റേഷൻ


പോം‌പൈയിലെത്തുന്ന സന്ദർശകർ അത്ഭുതപരതന്ത്രരാകുന്നത്, ഇരുപതു നൂറ്റാണ്ട് മുൻപുള്ള പോം‌പൈയുടെ നഗരാസൂത്രണം കാണുമ്പോഴാണ്. ഏത് ആധുനിക നഗരത്തെയും വെല്ലുന്ന രീതിയിലാണ് ജലസേചനം മുതൽ  ഡ്രൈനേജ് വരെ ഓരോ കാര്യവും പ്ലാൻ ചെയ്തിരിക്കുന്നത്.
ദേവാലയവും അൾത്താരയും

നഗരസ്വയംഭരണത്തിനായുള്ള യോഗങ്ങൾ നടത്തിയിരുന്ന ഹാളുകൾ ഒരു വശത്തായി കാണാം, വലിയ പില്ലറുകളുള്ള ഈ ഹാളുകളെ ബസലിക്ക എന്നാണത്രേ വിളിച്ചിരുന്നത്. പിൽക്കാലത്ത് ഈ മാതൃകയിലുള്ള നിർമ്മിതി പിൻ‌തുടർന്ന കൃസ്ത്യൻ ദേവാലയങ്ങളും ഇതേ പേരിൽ അറിയപ്പെട്ടു. 
ബസലിക്ക


അതു പോലെ ഫൌണ്ടനുകൾ, സ്നാനഗൃഹങ്ങൾ, ബേക്കറികൾ, പൊതു ടോയ്ലറ്റുകൾ അങ്ങനെ എല്ലാ ഒരു സ്വയം പര്യാപ്ത നഗരത്തിനു വേണ്ട എല്ലാ ഘടകങ്ങളും പോം‌പൈയിലുണ്ടായിരുന്നു. പോം‌പൈയിലെ ബേക്കറികളിലിരുന്ന് ഭക്ഷണം കഴിക്കാനും വാങ്ങിക്കൊണ്ടുപോകാനും സൌകര്യമുണ്ടായിരുന്നു, ഇന്നത്തെ ആധുനിക ബേക്കറികൾ പോലെ.
ബേക്കറി - വലിയ ഓവനുകൾ

ഖനനത്തിനിടെ കണ്ടെടുത്ത മൺപാത്രങ്ങളും പ്രതിമകളുമൊക്കെയായി ഒരു വശത്ത് വലിയ പ്രദർശനം ഒരുക്കിയിട്ടുണ്ട്. അതു പോലെ തന്നെ ലാവയിലുറഞ്ഞ് നൂറ്റാണ്ടുകൾ പഴക്കമുള്ള ഫോസിലായി മാറിയ മനുഷ്യരുടെയും അവരുടെ വളർത്തു മൃഗങ്ങളുടെയും ശരീരാവശിഷ്ടങ്ങളും.
ഫോസിലുകൾ - മനുഷ്യരുടെയും പാത്രങ്ങളുടെയും

ഫോസിലുകൾ - മനുഷ്യരുടെയും പാത്രങ്ങളുടെയും


ഒരിടത്ത് വേശ്യാത്തെരുവ് കാണാം. അവിടെ അതിഥികൾക്കായുള്ള ചെറിയ ചെറിയ മുറികളും അവയിൽ കല്ലിൽ തീർത്ത കിടക്കകളും ഒരുക്കിയിട്ടുണ്ട്. മുറികളുടെ ചുവരുകളിലും മേൽക്കൂരകളിലും നിരവധി ചിത്രങ്ങളും ശില്പങ്ങളും . ഇപ്പോൾ കാണുന്നതിലും വിപുലമായിരുന്നത്രേ യഥാർത്ഥത്തിലുണ്ടായിരുന്ന ‘സെറ്റ് അപ്പ്’. എന്നാൽ ഖനനം നടത്തിയ 16ആം നൂറ്റാണ്ടിലെ കർക്കശമായ സാമൂഹികക്രമം പ്രകടമായ ലൈംഗികത വിളിച്ചോതുന്ന ഈ ചിത്രങ്ങളും ശില്പങ്ങളും പ്രദർശിപ്പിക്കുന്നതിനു തടസ്സമായി നിന്നു. അന്വേഷകർ കണ്ടെടുത്ത ഇത്തരം ‘കലാരൂപങ്ങൾ’ വീണ്ടും മണ്ണിനടിടിയിൽ കുഴിച്ചു മൂടുകയാണത്രേ ചെയ്തത്. 2000 ത്തിൽ മാത്രമാണ് ഇവ പൊതു ദർശനത്തിനായി തുടർന്നു കൊടുത്തത്.

തിരക്ക് - ചിത്രങ്ങളും ശില്പങ്ങളും കാണാൻ

നടന്നു നടന്ന് നിറയെ വീടുകളുള്ള ഒരു ‘ഹൌസിങ്ങ് കോളനി’ യിലെത്തി. കേരളമാതൃകയിൽ നടുമുറ്റമുള്ള ഒരു വീട് കൌതുകമായി തോന്നി. വീടിനു മുന്നിൽ നായയുണ്ട് സൂക്ഷിക്കുക എന്ന് ലാറ്റിൻ ഭാഷയിലുള്ള മുന്നറിയിപ്പുമുണ്ട്. 

‘ഇറ്റാലിയൻ മാർബിൾ’ 2000 വർഷത്തെ പഴക്കമുള്ളത്

വീടിനു പുറകിലായി ഡെമോക്ലിസിന്റെ വാളുപോളെ തൂങ്ങിക്കിടക്കുന്ന അഗ്നിപർവ്വതത്തിന്റെ ദൃശ്യം ! അങ്ങോട്ടാണ് ഇനി യാത്ര.
അഗ്നിപർവ്വതം attached !


പോം‌പൈ കവാടം - പുറകിൽ വെസൂവിയസ്


പോം‌പൈയിൽ നിന്ന് ഒരു മണിക്കൂറോളം യാത്രയുണ്ട് വെസൂവിയസ് പർവ്വതത്തിലേക്ക്. മെഡിറ്ററേനിയൻ കടൽക്കരയിലൂടെയുള്ള ഹൈവേയിലൂടെയാണ് യാത്ര. കെട്ടിടങ്ങളും ഭൂപ്രകൃതിയും വടക്കൻ യൂറൊപ്പിൽ നിന്നും തികച്ചും വിഭിന്നമാണ്. ഹൈവേയിൽ നിന്നു തിരിഞ്ഞ് വളഞ്ഞുപുളഞ്ഞു കിടക്കുന്ന വഴിയിലൂടെ അഗ്നിപർവ്വതത്തിന്റെ 1 കിമീ താഴെ വരെ എത്താം. അവിടെന്ന് മുകളിലേക്ക് നടന്നു തന്നെ പോകണം...38 ഡിഗ്രി ചൂട്, ശക്തമായ പൊടിക്കാറ്റ്, വഴി നിറയെ ലാവ ഉറഞ്ഞ ചരൽമണ്ണ്. ഊന്നി നടക്കാൻ ഒരു വടി കിട്ടിയത് ആശ്വാസമായി തോന്നി...


പകുതി കയറുമ്പോൾ തന്നെ നേപ്പിൾസ് നഗരത്തിന്റെയും മെഡിറ്ററേനിയന്റെയും മനോഹരമായ കാഴ്ച കാണാം... താഴേക്കു നോക്കി പോം‌പൈയെ കണ്ടു പിടിക്കാൻ ശ്രമിച്ചെങ്കിലും നടന്നില്ല.

നേപിൾസ് - വെസൂവിയസിനു മുകളിൽ നിന്നും

മുകളിലെത്താറായപ്പോൾ അമ്പിളി തളർന്നു. ഇനിയൊരടി വയ്ക്കാനാവില്ലെന്നും തുമ്പിയെയും കൂട്ടി പകുതി വഴിക്കു നിന്നോളാമെന്നും പറഞ്ഞു അമ്പിളി. പക്ഷേ തുമ്പി വിടാൻ കൂട്ടാക്കിയില്ല...അവൾക്ക് മലയുടെ മുകളിൽ നിന്നും തീ വരുന്ന സ്ഥലം കണ്ടേ പറ്റു :)....പൊരിവെയിലത്ത് ഒറ്റക്കു നിൽക്കാൻ താല്പര്യമില്ലാത്തതു കൊണ്ട് നിവർത്തിയില്ലാതെ അമ്പിളിയും പുറകേ നടന്നു.

നടന്നു തളർന്നു വരുന്നവർക്ക് ഇരിക്കാനുള്ള സൌകര്യം ക്രേറ്ററിനു (അഗ്നിപർവ്വതമുഖം) തൊട്ട് താഴെയായുണ്ട്...അവിടെയെത്തി അല്പസമയം വിശ്രമിച്ചിട്ട് ഞങ്ങൾ വീണ്ടും മുകളിലേക്കു നടന്നു.

ഒരു സ്പൂണുകൊണ്ട് മലയുടെ മുകൾഭാഗം ചൂഴ്ന്നെടുത്ത പോലെയാണ് ക്രേറ്റർ കാണപ്പെടുന്നത്.
ഒരു പടുകൂറ്റൻ ഗർത്തം. അതിൽ നിന്നും ഉരുകിയ ലാവയും ചാരവും തെറിക്കുന്നതോർത്തപ്പോൾ മനസ്സിൽ ഒരുൾക്കിടിലം തോന്നാതിരുന്നില്ല. 


ക്രേറ്റർ - ആകാശദൃശ്യം (ചിത്രം വികിയിൽ നിന്നും)


വരണ്ടുണങ്ങിയ ക്രേറ്ററിനരികിലായി ഒരു കുഞ്ഞു പൂവ് വിടർന്നു നിൽക്കുന്നു. ജീവിതത്തിന്റെ കൊടിപ്പടം താഴ്താൻ വിജുഗീഷുവായ മൃത്യുവിനാവില്ല എന്ന കവിവാക്യത്തെ ഓർമ്മിപ്പിച്ചുകൊണ്ട്
ക്രേറ്റർ - അടുത്തു നിന്നും

അഗ്നിപർവ്വതത്തിനു മുകളിൽ നിന്ന് ചില ലാവക്കല്ലുകളും പെറുക്കി ഞങ്ങൾ തിരിച്ചു നടന്നു. തിരികെ പോകുന്ന വഴിയാണ് ലാവ ഒഴുകിയിറങ്ങിയ വഴി ശ്രദ്ധയിൽ പെട്ടത്. ഒരു.പുല്ലു പോലും കിളിർക്കാത്ത രീതിയിൽ ലാവ ഒഴുകിയ പാത തരിശ്ശായിരിക്കുന്നു. പോം‌പൈയെ വിഴുങ്ങിയ ശേഷവും വെസൂവിയസ് അടങ്ങിയിരുന്നില്ല.പിന്നെയും പലതവണ തീ തുപ്പിയ വേസൂവിയസ് അവസാനം ഗർജ്ജിച്ചത് 1944 ലാണത്രേ. ഇറ്റലിയെ കീഴ്പ്പെടുത്തി പോം‌പൈക്കടുത്തു താവളമടിച്ചിരുന്ന അമേരിക്കൻ വ്യോമസേനയുടെ നിരവധി ബോംബറുകൾ ഈ വിസ്ഫോടനത്തിൽ തകർന്നു എന്നാണ് കണക്ക്. തന്റെ വിരിമാറിലേക്ക്  തീവർഷിക്കുന്നതിന് ഭൂമി കൊടുത്ത ഒരു ചെറിയ ശിക്ഷയാവാം അത്.
        

Volcanic Ashes
ലാവ ഒഴുകിയിറങ്ങിയ വഴി
തിരികെ നേപ്പിൾസിലെത്തി അവിടെ നിന്നും റോമിലേക്കു തിരിച്ചു. 3 മണിക്കൂർ യാത്രയുണ്ട് റോമിലേക്ക്. ഇറ്റലിക്കാരനായ ഒരാളും ഈജിപ്റ്റിലെ അലക്സ്സ്ണ്ട്രിയയിൽ നിന്നു സന്ദർശനത്തിനെത്തിയ ദമ്പതികളുമാണ് ബെർത്തിൽ കൂടെ ഉണ്ടായിരുന്നത്. ആ ദമ്പതികളിലെ യുവതി അർമേനിയക്കാരിയാണ്. സരസമായി സംസാരിക്കുന്ന വാചാലയ അവർക്ക് അർമേനിയൻ, റഷ്യൻ, ഇറ്റലിയൻ, ജർമ്മൻ, ഇംഗ്ലീഷ്, അറബിക് തുടങ്ങി നിരവധി ഭാഷകളറിയാം. അമേരിക്കക്കാരനായ ഭർത്താവുമൊത്ത്  നേപ്പിൾസിൽ ഒരു ഓപറാ അവതരണത്തിനെത്തിയതാണ്. തുമ്പിമോൾക്കായി മനോഹരമായ ഒരു ഗാനമാലപിച്ചുകൊണ്ടാണവർ സംസാരം തുടങ്ങിയത്. സോവിയറ്റ് അധിനിവേശക്കാലത്തെ അർമേനിയയിലെ കുട്ടിക്കാലത്തെപ്പറ്റിയും ഈജിപ്റ്റിലെ വരണ്ട ജീവിതത്തെപറ്റിയുമൊക്കെ സംസാരിച്ചിരുന്ന് സമയം പോയതറിഞ്ഞില്ല. ട്രെയിൻ റോമിലെത്തി.

All roads lead to Rome...എല്ലാ വീഥികളും റോമിലേക്ക് അങ്ങനെ സീസറുടെയും മാർക്ക് ആന്റണിയുടെയും നാട്ടിൽ, മരണത്തോടു പടവെട്ടി കാണികളെ രസിപ്പിച്ച ഗ്ലാഡിയേറ്ററുകളുടെയും  നഗരം കത്തിയെരിയുമ്പോൾ വീണ വായിച്ചു ചിരിച്ച ചക്രവർത്തിമാരുടെയും നാട്ടിൽ, ജനാധിപത്യത്തിന്റെ ജന്മഭൂമിയിൽ, മാനവസംസ്കൃതിയുടെ കളിത്തൊട്ടിലിൽ, ഇനി രണ്ടു നാൾ... 

(തുടരും)

Tuesday, December 6, 2011

ഇറ്റലിയിലേക്ക്...

സമയം രാത്രി 8.50. 9 മണിക്കാണ്‌ മ്യൂണിക്കിൽ നിന്നും ഇറ്റലിയിലെ ഫ്ലോറെൻസിലോട്ടുള്ള ഡോയിച്ചെ ബാനിന്റെ സിറ്റി നൈറ്റ് ലൈൻ (CNL) ട്രെയിൻ. പ്ലാറ്റ്ഫോമിൽ വട്ടത്തിൽ കൂടിനിന്ന് തുമ്പിക്കുട്ടിയുടെ കൂടെ റിംഗാ-റിംഗാ-റോസെസ് കളിക്കുകയായിരുന്നു ഞങ്ങൾ . ഇൻഡ്യയിലാണെങ്കിൽ വട്ടാണെന്നു പറഞ്ഞ് ആൾക്കാർ കളിയാക്കും. ഇവിടെ ആരും മൈൻഡ് ചെയ്യില്ല.അപ്പോഴാണ്‌ ഒരു ജർമ്മൻകാരി ഇടിച്ചു കേറിവന്നൊരു ചോദ്യം ചോദിച്ചത്.

verstehen Sie Deutsch ? (ജർമ്മൻ മനസിലാകുമോ ?)

തൊട്ടടുത്തു നിന്നു കറങ്ങുന്ന അമ്പിളിയെ ചൂണ്ടിക്കാണിച്ച് ഞാൻ പറഞ്ഞു. ഇവൾ നിരക്ഷരകുക്ഷിയാണെങ്കിലും, ഞാൻ അത്യാവശ്യം ജർമ്മൻ പണ്ഡിതനാണ്‌. കേട്ടപാടെ അവൾ എന്നെ അടിമുടി ഒന്നു സൂക്ഷിച്ചു നോക്കി. എന്നിട്ടു പറഞ്ഞു. “അനൗൺസ് ചെയ്തത് ഒന്നും മനസ്സിലായില്ലേ ? ഫ്ലോറൻസിലേക്കുള്ള ട്രെയിൻ ക്യാൻസൽ ചെയ്തെന്നാ ഇപ്പോൾ വിളിച്ചു പറഞ്ഞത്”

“എപ്പ ?” മനസ്സിലൊരു ഡാം പൊട്ടി. “എന്താ കാരണം ?”

“അതൊന്നും പറഞ്ഞിട്ടില്ല. ക്യാൻസൽ ചെയ്തു എന്നു മാത്രമേ അനൌൺസ്മെന്റിൽ പറഞ്ഞുള്ളൂ. ഇൻഫൊർമേഷൻ സെന്ററിൽ പോയി ചോദിക്കണം” അതു പറഞ്ഞിട്ട് അവൾ നടന്നു നീങ്ങി. ഞങ്ങൾ തൊട്ടു പുറകെയും. ഇൻഫൊർമേഷൻ സെന്ററിൽ നിന്ന് എന്തെങ്കിലും ജർമ്മനിൽ പറഞ്ഞാൽ മനസ്സിലാക്കണമല്ലോ.

ഇൻഫൊർമേഷൻ സെന്ററിൽ വലിയൊരു ജനക്കൂട്ടം. ഏതാണ്ട് ദുരിതാശ്വാസക്യാമ്പിന്റെ ഒരു പ്രതീതി. അൽപസ്വല്പം അസ്വസ്ഥരാകാൻ തുടങ്ങിയ ജനങ്ങളെ സമാധാനിപ്പിക്കാൻ DB (ഡോയിച്ചെ ബാൻ)കാർ കോഫിയും മിനറൽ വാട്ടറുമൊക്കെ വിതരണം ചെയ്യുന്നുണ്ട്. കോഫിയുമായി ഞങ്ങളുടെ അടുത്ത വന്ന DBകാരനോട് കാര്യം തിരക്കി.അവനും എന്താ സംഭവം എന്നു വലിയ ഐഡിയ ഒന്നുമില്ല. വിഷമിക്കണ്ട വേറേ ട്രെയിൻ ഇടുമായിരിക്കും എന്ന് മാത്രം പറഞ്ഞ് സമാധാനിപ്പിച്ചു.


ഏതായാലും പ്ലാൻ മൊത്തം കുളമായിക്കിട്ടി.വളരെ റ്റൈറ്റ് ആയാണ്‌ ഇറ്റലി യാത്ര ഷെഡ്യൂൾ ചെയ്തിരുന്നത്. 4 ദിവസം കൊണ്ട് പിസയും ഫ്ലോറൻസും റോമും വത്തിക്കാനും കാണാനായിരുന്നു ആദ്യപ്ലാൻ.അതിനിടയിലാണ്‌ മണ്ണടിഞ്ഞു പോയ പോംപൈ എന്ന ചരിത്രനഗരത്തെ കാണാനുള്ള ആവേശം മൂത്ത് അതും കൂടി പ്ലാനിൽ    കുത്തിക്കയറ്റിയത്. അതിന്റെ പുറമേ ഒരു ട്രെയിൻ ഡിലേ കൂടെ താങ്ങാൻ എന്തായാലും നിവർത്തിയില്ല.

ഇറ്റലി

ഈ കോലാഹലം ആകെ ആസ്വദിച്ചത് തുമ്പിക്കുട്ടിയാണ്‌. അവൾക്കു ഏറ്റവും സങ്കടമുള്ള കാര്യം രാത്രി ഉറങ്ങുന്നതാണ്‌. അയ്യോ... രാത്രി ആകാറായോ എന്ന ചോദ്യവുമായാണ്‌ രാവിലെ എണീറ്റ് വരുന്നതു തന്നെ. ദിവസം മുഴുവൻ പറമ്പു കിളക്കുന്നതിനെക്കാൾ ആയാസകരമായ ജോലിയാണ്‌ അവളെ ഒന്നുറക്കിയെടുക്കാൻ. ഇവിടെ ഉറങ്ങാൻ യാതൊരു സാധ്യതയും ഇല്ലാത്തതു കൊണ്ട് അവൾ ആ വലിയ ക്യൂവിനു ചുറ്റും ഹാപ്പിയായി ചാടിത്തുള്ളി നടന്നു.

ഏതാണ്ട് 3 മണിക്കൂർ ക്യൂ നിന്ന് കൗണ്ടറിലെത്തിയപ്പോൾ കാര്യങ്ങളുടെ ഏകദേശരൂപം പിടികിട്ടി. ജർമ്മനിക്കും ഓസ്ട്രിയക്കുമിടയിലെ ഇലക്ട്രിക് ലൈൻ കനത്ത മഴയിലും ഇടിമിന്നലിലും താറുമാറായത്രെ. അതു ശരിയായാലേ ഏതു ട്രെയിനിനും പോകാൻ കഴിയൂ. ഇവിടെ നിന്നും ഇറ്റലിക്കു ആദ്യം പോകുന്നത് ഞങ്ങളുടെ ട്രെയിൻ തന്നെ ആയിരിക്കും എന്നവർ ഉറപ്പുതന്നു. എന്തെങ്കിലും കാരണവശാൽ യാത്ര മുടങ്ങിയാൽ ഇറ്റലിയിലെ ലോക്കൽ ടിക്കറ്റുകൾ അടക്കം എല്ലാത്തിന്റെയും പണം മടക്കിത്തരാം എന്നും പറഞ്ഞ് ടിക്കറ്റുകളിൽ സീൽ അടിച്ചു തരികയും ചെയ്തു.


കൂടുതൽ നിന്ന് സമയം പാഴാക്കുന്നതിൽ അർത്ഥമില്ലാത്തതു കൊണ്ട് ട്രെയിനിനടുത്തേക്കു തിരിച്ചു .ബെർത്തിൽ 2 പെൺകുട്ടികൾ നേരത്തേ സ്ഥാനം പിടിച്ചിട്ടുണ്ട്. ഉറുഗ്വേയിൽ നിന്നും വന്ന ടൂറിസ്റ്റുകൾ. തുമ്പിക്കുട്ടി ബെർത്തിൽ കയറിയപ്പോഴേ കണ്ണിറുക്കിക്കാണിച്ച് അവരെ കയ്യിലെടുത്തിരുന്നു. ആ പരിചയതിന്റെ പേരിൽ സംസാരം തുടങ്ങി. രണ്ടുപേർക്കും ഇംഗ്ലീഷ് കഷ്ടി പിഷ്ടിയാണ്‌.കയ്യും കലാശവുമായാണ്‌ വർത്തമാനം. എനിക്ക് ഉറുഗ്വേയെപ്പറ്റി ആകെ അറിയാവുന്നത്  അവർ “കോപ്പ” അമേരിക്ക ചാമ്പ്യന്മാരണെന്നും അതിസുന്ദരിമാരുടെ നാടെന്നും മാത്രം. ആദ്യത്തെ കാര്യം ആഗ്യഭാഷയിൽ പറഞ്ഞൊപ്പിച്ചു. (എങ്ങനെയാണെന്ന് ഊഹിച്ചു നോക്കിക്കോളൂ). ഭാര്യ അടുത്തിരിക്കുന്നതു കൊണ്ട് രണ്ടാമത്തെ കാര്യം ആംഗ്യഭാഷയിൽ പറയാൻ തുനിഞ്ഞില്ല. അർദ്ധരാത്രി കഴിഞ്ഞ സമയം. വല്ലതും തെറ്റിദ്ധരിച്ചാലോ ?


അവസാനം ട്രെയിൻ വിട്ടു. ഉച്ചക്കു മുൻപ് ഫ്ലോറൻസിൽ എത്തിയാൽ പ്ലാൻ ചെയ്ത പോലെ ഫ്ലോറൻസും പിസയും കാണാൻ പോകാം എന്നും അല്ലെങ്കിൽ പരിപാടി ക്യാൻസൽ ചെയ്ത് നേരെ നേപിൾസിനു വിടാം (നേപിൾസിനടുത്താണ് പോംപൈ ) എന്നും പ്ലാൻ ചെയ്ത് കിടന്നുറങ്ങി.




ഏതാണ്ട് മൂന്നര മണിക്കൂർ വൈകി രാവിലെ പത്തു മണിയോടെ ട്രെയിൻ ഇറ്റാലിയനിൽ ഫിരെൻസെ(Firenze) എന്നറിയപ്പെടുന്ന ഫ്ലോറൻസിലെത്തി. ഇവിടെ നിന്നും 100 കിലോമീറ്റർ അകലെയായാണ്‌ പിസ എന്ന കുഞ്ഞുപട്ടണവും അവിടെയുള്ള പ്രസിദ്ധമായ പിസയിലെ ചരിഞ്ഞ ഗോപുരവും. ട്രെയിനിന്റെ ‘അപഥ’സഞ്ചാരം കൊണ്ട് കുറിച്ചുകൊണ്ടു വന്ന കണക്ഷൻ വിവരങ്ങളൊക്കെ ഉപയോഗശൂന്യമായിരിക്കുന്നു .തൊട്ടടുത്ത പ്ലാറ്റ്ഫോമിൽ തന്നെ പിസയിലോട്ടുള്ള ട്രെയിൻ പുറപ്പെടാൻ തയ്യാറായി കിടപ്പുണ്ട്. ടിക്കറ്റെടുക്കാനുള്ള മെഷീനിൽ ഇംഗ്ലീഷ് ഭാഷ സെലക്റ്റ് ചെയ്യാൻ നോക്കിയിട്ട് പറ്റുന്നില്ല.അവസാനം അറിയാവുന്ന ഇറ്റാലിയനിൽ (((ങേ!))) തന്നെ പയറ്റിനോക്കാം എന്നു കരുതി എവിടെയൊക്കെയോ പിടിച്ചു ഞെക്കി ടിക്കറ്റെടുത്തു. ടിക്കറ്റിന്‌ ഒരാൾക്ക് 8 യൂറോ ആണെന്നാണ്‌ ഇന്റെർനെറ്റിൽ കണ്ടത്. മെഷീൻ ചാർജ് ചെയ്തത് 3.50 യൂറോ മാത്രവും. ലാഭമായല്ലോ എന്നോർത്ത് ഒന്നുകൂടെ നോക്കിയപ്പോഴാണ്‌ അബദ്ധം മനസ്സിലായത്. സൈക്കിൾ കൊണ്ടു പോകാനുള്ള ടിക്കറ്റാണ്‌ വാങ്ങി വച്ചിരിക്കുന്നത്. വീണ്ടും ടിക്കറ്റെടുക്കേണ്ടി വന്നത് മിച്ചം.

Florence SMN a.k.a Firenze Santa Maria Novella

പിസ്സയിലേക്കുള്ള ലോക്കൽ ട്രെയിൻ നിറയെ യാത്രക്കാരുണ്ടായിരുന്നു. വിദേശടൂറിസ്റ്റുകളാണ്‌ ബഹുഭൂരിഭാഗവും.അധികം താമസിയാതെ ടിക്കറ്റ് ചെക്കർ വന്നു.മെഷീനിൽ നിന്ന് വാങ്ങിയ ടിക്കറ്റ് സ്റ്റേഷനിൽ വാലിഡേറ്റ് ചെയ്യണമായിരുന്നത്രെ. ടിക്കറ്റിൽ എന്തൊക്കെയോ കുത്തിവരച്ചിട്ട് ഫൈനും വാങ്ങി അയാൾ നടന്നു പോയി. ലോകത്തുള്ള ടിടിമാർക്കൊക്കെ അതിന്ത്യയിലായാലും ഇറ്റലിയിലായാലും എന്നെ കാണുമ്പോൾ ഒന്നു തപ്പിവിടണം എന്നു തോന്നുന്നതിന്റെ ലോജിക് ഇപ്പോഴും എനിക്കു മനസ്സിലായിട്ടില്ല. ഏതായാലും നല്ല ഐശ്വര്യം..അബദ്ധങ്ങളുടെ ഘോഷയാത്രയുമായാണ്‌ ഇറ്റലിയിലെത്തിയിരിക്കുന്നത്.
അർണോ നദിയും പിസ പട്ടണവും (2006 ലെ ചിത്രം)
ട്രെയിൻ പിസ സെന്റ്രലിലെത്തി. സ്റ്റേഷനിൽ നിന്ന് ഒരു കിലോമീറ്റർ അകലെയുള്ള പിസാ ഗോപുരത്തിലേക്ക് നടന്നു പോകാം എന്നാണ്‌ ആദ്യം കരുതിയിരുന്നത്. അർണോ നദിയുടെ തീരത്തു കൂടിയുള്ള യാത്ര അതീവഹൃദ്യമാണ് . പക്ഷേ സമയക്കുറവു മൂലം കൂടെ വന്ന അസംഖ്യം ടൂറിസ്റ്റുകളുടെ കൂടെ ഒരു ബസിൽ ഇടിച്ചു കയറി.

ആദ്യം കണ്ണിൽ പെടുന്നത് - പിസ കത്തീഡ്രൽ
ബസ്സിറങ്ങുമ്പോൾ ആദ്യം കണ്ണിൽ പെടുന്നത് പിസാ കത്തീഡ്രലാണ്‌. ഒരു പക്ഷേ ചരിഞ്ഞ ഗോപുരത്തിന്റെ സാന്നിധ്യം ഒന്നു കൊണ്ടു മാത്രം സന്ദർശകരുടെ ശ്രദ്ധ കിട്ടാതെ പോയ ഒരു മനോഹര സൗധമാണ്‌ പിസാ കത്തീഡ്രൽ. 11 ആം നൂറ്റാണ്ടിലാണ്‌ പിസാ കത്തീഡ്രൽ നിർമ്മിക്കുന്നത്. വീണ്ടും ഒരു നൂറു വർഷം കൂടി കഴിഞ്ഞാണ്‌ കത്തീഡ്രലിനോട് ചേർന്നുള്ള ബെൽ ടവറിന്റെ നിർമ്മാണം ആരംഭിക്കുന്നത്.പണി തുടങ്ങി 5 വർഷം കഴിഞ്ഞപ്പോഴേ ബെൽ ടവർ ചരിഞ്ഞു തുടക്കി. പണി പാളി എന്നോർത്ത് നിർമ്മാണം ഇടയ്ക്കു വച്ചു നിർത്തുകയും ചെയ്തു. പിന്നെയും ഒരു നൂറ്റാണ്ട് കഴിഞ്ഞാണ്‌ ചരിഞ്ഞ നിലയിൽ തന്നെ ഇതിന്റെ ബാക്കി പണിഞ്ഞു തരാം എന്ന വാഗ്ദാനവുമായി ഒരു സമർത്ഥൻ മുന്നോട്ടുവരുന്നത്. ബാക്കി പണി തീർത്ത് മുകളിൽ പള്ളി മണികളും മറ്റും സ്ഥാപിച്ചത് ഇദ്ദേഹമാണ്‌.
പിസ കത്തീഡ്രൽ - കൂടുതൽ അടുത്തു നിന്ന്

ടവറിനടുത്തോട്ട് നടക്കുന്തോറും ചരിവ് കൂടുതൽ വ്യക്തമായി കാണാം. ഏതാണ്ട് അഞ്ചര ഡിഗ്രി ആണ്‌ ഇതിന്റെ ചരിവ് അളന്ന് തിട്ടപ്പെടുത്തിയിരിക്കുന്നത്. അടിയിലെ മണ്ണിന്റെ ബലക്കുറവു കാരണം ഇപ്പോഴും ചരിഞ്ഞു കൊണ്ടിരിക്കുകയാണ്‌ പിസാ ഗോപുരം.
ചരിഞ്ഞ ഗോപുരം

പിസാ ടവർ കാണുന്നതിനെക്കാൾ രസമാണ്‌ അവിടെയുള്ള ടൂറിസ്റ്റുകളെ നിരീക്ഷിക്കാൻ. ടവറിനെ താങ്ങി നിർത്താനും തള്ളിയിടാനുമൊക്കെയുള്ള ഭാവത്തിൽ വലിഞ്ഞമർന്നും മസിലുപിടിച്ചുമൊക്കെ ഫോട്ടോകൾക്ക് പോസു ചെയ്യുകയാണ്‌ ലോകമെമ്പാടും നിന്ന് ഈ മഹാല്ഭുതം കാണാൻ എത്തിയിട്ടുള്ള ടൂറിസ്റ്റുകൾ.

ചിത്രം science-blogs.com ഇൽ നിന്നും
ശാസ്ത്രരംഗത്തെ മാറ്റിമറിച്ച ചില പരീക്ഷണങ്ങൾക്കും പിസാ ഗോപുരം വേദിയായിട്ടുണ്ട്. താഴേക്ക് വീഴുന്ന കല്ലും തൂവലും വായുവിന്റെ പ്രതിരോധമില്ലെങ്കിൽ ഒരേ വേഗതയിലായിരിക്കും സഞ്ചരിക്കുന്നത് എന്ന് അന്നത്തെ ശാസ്ത്രവിശ്വാസങ്ങളെ വെല്ലുവിളിച്ച് ഗലീലിയോ തെളിയിച്ചത് പിസാ ടവറിൽ വച്ചു നടത്തിയ ഒരു പരീക്ഷണത്തിലാണ്‌.
പിസാ ഗോപുരത്തിന്റെ നിർമ്മാണം - ചരിത്രത്താലുകളിലൂടെ

ഇത്തവണ ടവറിനു മുകളിലേക്ക് കയറണം എന്നുറപ്പിച്ചാണ്‌ വന്നത്. മുൻപൊരിക്കൽ പിസയിൽ വരാൻ അവസരമുണ്ടായപ്പോൾ മുകളിലേക്ക് കയറാൻ കഴിഞ്ഞിരുന്നില്ല. ടവറിനു മുന്നിലെ വമ്പൻ ക്യൂ കണ്ടപ്പോൾ മനസ്സിലായി ഇത്തവണയും ആ ആഗ്രഹം നടക്കാൻ പോകുന്നില്ല എന്ന്. ലേറ്റായി എത്തിയ ഡിബിയുടെ ട്രെയിനിന്‌ ‘നല്ല നമസ്കാരം’ പറഞ്ഞിട്ട് ടവറിന്റെ പിൻ ഭാഗത്തേക്ക് നടന്നു.
കത്തീഡ്രൽ - പിൻ ഭാഗത്തു നിന്നുള്ള ദൃശ്യം

പിസാ ഗോപുരത്തിന്റെ ചരിവ് എല്ലാ ഭാഗത്തും ഒരു പോലല്ല. താഴ്ഭാഗത്ത് ചരിവു കൂടുതലാണ്‌. പിന്നീട് കെട്ടിയ മുകളിലെ നിലകൾ ചരിവിനെ കൊമ്പൻസേറ്റ് ചെയ്യാനായാണ്‌ നിർമ്മിച്ചിരിക്കുന്നത്. ചരിഞ്ഞു വീഴുന്നതിനെ ഒടിച്ചു മുകളിലേക്കാക്കിയതു മനസ്സിലാക്കാം സൂക്ഷിച്ചു നോക്കിയാൽ.





ചരിഞ്ഞു വീഴുന്നതിനെ ഒടിച്ചു മുകളിലേക്കാക്കിയത്

ചെന്നായ വളർത്തിയ സഹോദരങ്ങളായ റെമസും റോമുലസുമാണ് റോമാ നഗരം (Rome) സ്ഥാപിച്ചതെന്ന് ഒരു കഥയുണ്ട്. ചെന്നായ പാലൂട്ടുന്ന റെമസിന്റെയും റോമുലസിന്റെയും ഒരു സ്തൂപം പിസാ ഗോപുരത്തിനു പിന്നിലായി സ്ഥാപിച്ചിട്ടുണ്ട് 

റോമസും റോമുലസും

അധികം വൈകാതെ ഫ്ലോറൻസിലേക്ക് തിരിച്ചു. യൂറോപ്പിന്റെ നവോത്ഥാനത്തിന്‌ (Renaissance) വിത്തു പാകിയ നഗരം എന്ന പേരിലാണ്‌ ഫ്ലോറൻസ് ലോകമെങ്ങും പ്രസിദ്ധിയാർജ്ജിച്ചത്. റോമൻ സാമ്രാജ്യത്തിന്റെ അധഃപതനത്തിനു ശേഷം കലാരംഗത്തും ശാസ്ത്രരംഗത്തും കാര്യമായ പുരോഗതിയൊന്നുമില്ലാതെ ദീർഘകാലം ഇരുണ്ടയുഗത്തിലായിരുന്നു യൂറോപ്പ്. ഈ ഇരുണ്ട യുഗത്തിൽ നിന്ന് യൂറോപ്പിനെ കൈപിടിച്ചുയർത്തിയത് ഡാവിഞ്ചി, ഗലീലിയോ, മൈക്കൽ ആഞ്ചലോ, ബോട്ടിസെല്ലി തുടങ്ങിയരുടെ ബഹുമുഖസംഭാവനകളാണ്‌. നവോത്ഥാനകാലയൂറോപ്യൻ നിർമ്മിതിയുടെ മകുടോദാഹരണമാണ്‌ ഫ്ലോറൻസിലെ പ്രധാന ദേവാലയമായ ബസലിക്ക ഡി സാന്താ മരിയ ഡെൽ ഫ്ലൊറെ.
ഫ്ലോറൻസ് കത്തീഡ്രൽ
ഒരു ജർമ്മൻ സുഹൃത്ത് പറഞ്ഞത് യൂറൊപ്പിന്റെ നവോത്ഥാനം യഥാർത്ഥത്തിൽ ആരംഭിച്ചത് സ്റ്റുട്ട്ഗാർട്ടിനും മ്യൂണിക്കിനുമിടയിലുള്ള ആഗ്സ്ബുർഗ് എന്ന ബവേരിയൻ പട്ടണത്തിൽ നിന്നാണെന്നാണ്‌.ആറ്റംബോംബു മുതൽ പുട്ടിനും കടലയ്ക്കും വരെ എല്ലാത്തിനും അവകാശം സ്ഥാപിക്കുന്നത് ജർമൻകാരുടെ പതിവാണ്‌.

നവോത്ഥാനത്തിന്റെ തൊട്ടിൽ - ഫ്ലോറൻസ്
പൂർണ്ണമായും മാർബിൾ കൊണ്ടു നിർമ്മിച്ചതാണ് ഫ്ലോറൻസ് കത്തീഡ്രൽ. ദേവാലയത്തിന്റെ അസ്ഥിവാരം മുതൽ മേൽക്കൂര വരെ മനോഹരമായ ചുവർചിത്രങ്ങളും ശില്പങ്ങളും കൊണ്ട് അലങ്കരിച്ചിട്ടുണ്ട്.
ശില്പചാതുരി

ഫ്ലോറൻസിലെ മറ്റൊരു പ്രധാന ആകർഷണം  മൈക്കൽ ആഞ്ചെലോ നിർമ്മിച്ച ഗോലിയാത്തിനെ എതിരിടുന്ന ദാവീദിന്റെ ശില്പമാണ്.ഫ്ലോറൻസ് കത്തീഡ്രലിൽ നിന്ന് ഏതാനും മീറ്റർ അകലെയായുള്ള പിയാസ ഡെല്ല സിഗ്നോറിയ (Piazza della Signoria) എന്ന സ്ക്വയറിലാണ് ഈ ശില്പം സ്ഥാപിച്ചിരിക്കുന്നത്. നിശ്ചയദാർഢ്യവും ആത്മവിശ്വാസവും കൊണ്ടു മാത്രം അതികായനായ ശത്രുവിനെ എതിരിടുന്ന ദാവീദിന്റെ സുധീരവും അതേസമയം സമചിത്തവുമായ മുഖഭാവം മനസ്സിൽ നിന്ന് പെട്ടെന്ന് വിട്ടുപോരില്ല. ദാവീദുമാരിനി നമ്മുടെ നാട്ടിലും ജനിക്കേണ്ടിയിരിക്കുന്നുവെന്ന് തോന്നുന്നു, മുല്ലപ്പെരിയാറിനെയും കേരളത്തെയും രക്ഷിച്ചെടുക്കാൻ.
സമരസന്നദ്ധനായ ദാവീദ് - മൈക്കലാഞ്ചലോയുടെ മാസ്റ്റർപീസ്
നിശ്ചയദാർഢ്യം -ദാവീദ്, ചിത്രം വിക്കിയിൽ നിന്നും
1505 ഇൽ അനാച്ഛാദനം ചെയ്ത ഈ പ്രതിമ ചില മനോരോഗികളുടെ ഒറ്റപ്പെട്ട ആക്രമണങ്ങളെ തുടർന്ന് അക്കാദെമീയ (Accademia) എന്ന ആർട്ട് മ്യൂസിയത്തിലേക്ക് മാറ്റി. ഇന്നവിടെ കാണുന്നത് അതിന്റെ പൂർണ്ണരൂപത്തിലൂള്ള റിപ്ളിക മാത്രം. ദാവീദിനെ കൂടാതെ സമുദ്രദേവനായ നെപ്ട്യൂണിന്റെയും മെഡൂസയുടെ തല കൊയ്തെടുക്കുന്ന പെർസ്യൂസിന്റെയുമൊക്കെ ശില്പങ്ങൾ Piazza della Signoria ഇൽ കാണാം.

സമുദ്രദേവൻ
വേനൽക്കാലമായിരുന്നതിനാൽ ജനനിബിഡമായിരുന്നു Piazza della Signoria. തെരുവു ഗായകരും മജീഷ്യന്മാരും ടൂറിസ്റ്റുകളുമൊക്കെയായി വലിയൊരു ജനക്കൂട്ടം.
പെർസ്യൂസ്
തിരിച്ച് ഫ്ലോറൻസ് റെയിൽവേ സ്റ്റേഷനിൽ ഓടിക്കിതച്ചെത്തുമ്പോൾ നേപിൾസിലേക്കുള്ള ട്രെയിൻ കാത്തു കിടപ്പുണ്ടായിരുന്നു. നേപിൾസിലേക്കുള്ള 500 കിലോമീറ്റർ ദൂരം 2.5 മണിക്കൂർ കൊണ്ട് സഞ്ചരിക്കുന്ന ട്രെൻ ഇറ്റാലിയയുടെ ഫ്രെച്ചാറോസാ (Freccia rossa). ചുവന്ന അമ്പ് എന്നാണത്രേ ഫ്രെച്ചാറോസായുടെ അർത്ഥം. മണിക്കൂറിൽ 370 കിമി വരെ വേഗതയിൽ കുതിച്ചു പായാൻ കഴിവുള്ളവനാണീ ചുവന്ന അമ്പ്.
ഫ്രെച്ചാറോസാ

അങ്ങനെ ചുവന്ന അമ്പിലേറി നേപിൾസിലേക്ക്....സർക്കാരിനെ നിയന്ത്രിക്കുന്ന മാഫിയാ സംഘങ്ങൾക്കും മയക്കുമരുന്ന് രാജാക്കന്മാർക്കും ഗ്യാങ്ങ് വാറുകൾക്കും കുപ്രസിദ്ധമായ നഗരം. ‘Godfather’ സിനിമയിലൂടെ ലോകമെങ്ങും അറിയപ്പെട്ട അധോലോകപട്ടണം സിസിലിയെക്കാൾ ഇറ്റാലിയൻ ഗവണ്മെന്റിന്‌ തലവേദന ഉണ്ടാക്കുന്ന,  പീറ്റ്സയുടെയും (Pizza) മാഫിയയുടെയും ജന്മഗൃഹം - ജർമ്മനിലും ഇറ്റാലിയനിലും നാപോളി എന്നറിയപ്പെടുന്ന നേപിൾസ്.

(ഇനിയും ബാക്കി..)