കശപിശ

വർഷാന്ത്യം ജീവിതത്തിലെ ലാഭനഷ്ടക്കണക്കുകൾ ഒത്തുനോക്കിയപ്പോഴാണ് ഞെട്ടിക്കുന്ന ആ സത്യം മനസ്സിലാക്കിയത്. 2013 ഇൽ ഒരു ബ്ലോഗ് പോസ്റ്റ് പോലുമില്ല....സാഹചര്യങ്ങളുടെ സമ്മർദ്ദവും പരിതസ്ഥിതിയുടെ പരുപരുപ്പും മൂലം ആശയശുഷ്കമായ മനസ്സിൽ ഈ ചുരുങ്ങിയ നിമിഷങ്ങളിൽ ഒരു കുറിപ്പെഴുതാനാവില്ലല്ല്ലോ എന്ന തിരിച്ചറിവാണ് ഈ പോസ്റ്റിനാധാരം...

7 ആം ക്ലാസ്സിൽ വച്ച് ഡയറിയിൽ കുത്തിക്കുറിച്ച ഒരു കവിത കയ്യെഴുത്ത് പ്രതി സഹിതം പോസ്റ്റുന്നു...2014 ഈ ബ്ലോഗിനൊരു പുതു വസന്തമായിരിക്കും എന്ന് ഈ പോസ്റ്റ് സാക്ഷിയാക്കി ഞാൻ പ്രതിജ്ഞ ചെയ്യുന്നു.. ജയ് ഹിന്ദ് !!

കശപിശ

പറയുക പറയുക സോദരരേ..
പണിയെന്താണേ ഇക്കാലം..
പുതുതായങ്ങനെ പൊങ്ങിവരുന്നൊരു
പള്ളിപൊളിക്കും പണിയാണേ...

പറയൂ നിന്തൊഴിലെന്താണേ..
പകലിൽ കൊള്ള തുടങ്ങുന്നോ
പഹയൻ തമ്പ്രാൻ തൻ വീട്ടിൻ
പുരക്കു കല്ലെറി പതിവാണേ..

പൌലോസച്ചാ പറയില്ലേ
പതിവായ് നിന്തൊഴിലെന്താണേ..
പറയാമല്ലോ ക്ഷേത്രത്തിൽ
പട്ടയൊഴിക്കും തൊഴിലാണേ..

പറയൻ ചാത്താ പറയുന്നോ
പാരിൽ നിൻ തൊഴിലെന്താണേ..
പറയാം കുന്നിൻ മണ്ടേന്ന്
പള്ളീനോക്കി കല്ലെറിയും..

പക്കീരുകാ‍ക്കാ പറയുന്നോ
പണ്ടേ നിന്നുടെ തൊഴിലെന്ത് ?
പറയാം സിക്കിൻ താടീല്
പിടിവലി കൂടും പണിയാണ്..

പലവിധമുണ്ടേ ജാതിക്കാർ
പലവിധമുണ്ട് മതക്കരും
പലപലതാണീ ഇന്ത്യാക്കാർ
പലതരമിങ്ങനെ കശപിശയും...

എല്ലാവർക്കും എന്റെ പുതുവത്സരാശംസകൾ..!

നിഴൽ

എന്റെ നിഴൽ എന്തു കൊണ്ടാണ് എന്നെ അനുസരിക്കാത്തത് ?
ഇരുട്ടിൽ ഞാൻ ഒറ്റയ്ക്കാകുമ്പോൾ മറഞ്ഞു കളയുന്നത് ?
ഞാൻ വെളിച്ചത്തോടടുക്കുമ്പോൾ വളർന്നു വലുതായി
എന്നിൽ നിന്ന് അകന്നകന്നു പോകുന്നത് ?
എന്തു കൊണ്ടാണ് ഞാൻ മണ്ണോടടിയുമ്പോൾ മാത്രം
നിഴൽ എന്നിലലിയുന്നത് ?

...

ഒരു ശിലായുഗകവിയുടെ ഡയറിയിൽ നിന്ന്...

       

നാട്ടിലെത്തി പഴയ ഡയറിത്താളുകളിൽ നിന്നും തപ്പിയെടുത്ത ചില അതിപുരാതന നുറുങ്ങു കവിതകൾ ഇവിടെച്ചേർക്കുന്നു. ഇതു കാണിച്ച് ഈ ബ്ലോഗിന്‌ ഒരു ക്ലാസ്സിക്കൽ പദവി നേടിയെടുക്കുകയാണ്‌ ഇപ്പോഴത്തെ ലക്ഷ്യം.


ജീവിതം യൗവ്വനയുക്തവും ഹൃദയം പ്രണയാർദ്രവുമായിരുന്ന കാലത്തു കുറിച്ചിട്ട ഒരു ഗാനശകലമിതാ..

നിലാവിനെ സ്നേഹിച്ച പെൺകൊടി നീ

നിശയുടെ മാറിലെ ശാരിക നീ
ജീവന്റെജീവനിലൂട്ടി വളർത്തിയൊ-
രോമൽക്കിനാവിലെ നായിക നീ
എന്റെ ഓമൽകിനാവിലെ നായിക നീ
(നിലാവിനെ സ്നേഹിച്ച ...) - 1




എന്റെ പാഴ്ജീവനിൽ തേനും വയമ്പുമായ്
നിന്റെയീ സ്നേഹം വിതുമ്പെ ,
വിണ്ണിലെ ഗന്ധർവ്വകിന്നരർ കൺചിമ്മി
എന്നിലസൂയാർത്തരാകെ ,
ഒരു മാത്ര കൂടിയാ മധുരമാം നൊമ്പര
മോർത്തു ഞൻ ധന്യനാകട്ടെ ..
എന്റെ കിനാക്കളിൽ ഞാനലിയട്ടെ
(നിലാവിനെ സ്നേഹിച്ച ...) - 1




ഒരു കുഞ്ഞു കാറ്റിന്റെ ഈണത്തിൽ ഞാനെന്റെ
മാനസം പങ്കുവയ്ക്കാം.
അതിലെന്റെ ജീവനും സ്വപ്നങ്ങളും ഞാൻ
നിനക്കായി പകുത്തു നല്കാം.


നീയെന്റെ പ്രാണന്റെ താളമല്ലേ .
ഈ ഇരുളിലെൻ ആത്മപ്രകാശമല്ലേ ..
ഈ ഇരുളിലെൻ ആത്മപ്രകാശമല്ലേ ..
(നിലാവിനെ സ്നേഹിച്ച ...) - 2

എന്നാൽ ചില ചില്ലറ ബ്ലോഗു കവികളെപ്പോലെ പ്രണയം, വിരഹം, രാത്രി, മരുഭൂമി, മട്ടൺ ഫ്രൈ തുടങ്ങിയ സാദാ ക്ലീഷേകളിൽ ഒതുങ്ങുന്നവയായിരുന്നില്ല എന്റെ കവിതകൾ. തൂലികയെ പടവാളാക്കാനുള്ള ശക്തി അന്നേ എന്റെ കവിതകൾക്കുണ്ടായിരുന്നു :) . ഇതു കണ്ടോ ...കേന്ദ്രമന്ത്രിയായിരുന്ന ആന്റണി കേരള മുഖ്യമന്ത്രിസ്ഥാനമേറ്റെടുത്തപ്പോഴെഴുതിയ ഒരു കവിത.ഒരു പതിനഞ്ചു വർഷം മുമ്പെഴുതിയത്..

ദില്ലിയിൽ കക്കണ പഞ്ചാര പോലല്ല

മാമല നാട്ടിന്റെ മന്ത്രിപദം

കയ്ക്കുമെരിക്കും ചവർക്കും പുളിക്കുമതു പിന്നെ

കട്ടതു കൂടിയാലെരിഞ്ഞുപോകും

കൈക്കൂലി കിട്ടുന്ന കാശൊക്കെ സ്വിസ്ബാങ്കിൽ

ഡോളറായ് മാറ്റണ മന്ത്രിമുഖ്യാ

അക്കൌണ്ടു ബുക്കിലെ അക്കങ്ങൾ കൂടുമ്പോൾ

ലാളിത്യം ചൊല്ലുവാൻ നാണമില്ലേ

കൂട്ടരെ പലരെയും പാര പണിഞ്ഞിട്ട്

കൂട്ടായ്മ ചൊല്ലുവാൻ മോഹമില്ലേ

കാനറാബാങ്കിന്റെ ലോക്കറു പൂട്ടീട്ട്

കാന്റീനിൽ പോകണതാർക്കു വേണ്ടി.

തണ്ടൂരിക്കാരുമായ് കൂട്ടില്ല ഞങ്ങൾക്കെന്ന്

തന്റേടമോതുവാൻ ധൈര്യമുണ്ടോ ?

Dont worry മഹാകവികളേ...ഞാൻ കവിതയെഴുതി ആരുടെയും അന്നം മുട്ടിക്കുകയൊന്നുമില്ല.ഇപ്പൊ ആൾറൗണ്ടർമാർക്കാണല്ലോ ഡിമാന്റ്...അളമുട്ടിയാൽ ചേരയും കടിക്കും എന്നു പറയുന്നപോലെ ഗതികെട്ടാൽ ഞാനും കവിത എഴുതും എന്ന ഒരു സൂചന മാത്രം.


പിന്നെ, ഞാൻ തിരിച്ചെത്തി...അനന്തപുരിയുടെ സമശീതോഷ്ണത്തിൽ നിന്ന് ബവേരിയയുടെ അതിശൈത്യത്തിലേക്ക് .വിഴിഞ്ഞത്തു നിന്നും വിളപ്പിൽ ശാലയിൽ നിന്നും  ആവേശമുൾക്കൊണ്ട് വികാരവിജ്രംഭിതനായി പൂർവ്വാധികം ശക്തിയോടെ വീണ്ടും പേനയുന്താൻ തുടങ്ങുന്നു. ഒരു കൊടുംകാറ്റിനു മുൻപുള്ള ശാന്തതയാണ് ഇതുവരെ നിങ്ങൾ കണ്ടത്... ജാഗ്രതൈ....